毛棯

這是毛棯, 是野牡丹科植物, 我以前也分錯毛棯及野牡丹, 足足有十年之久...上課唔留心學錯野也...花是紫紅色, 跟野牡丹及山棯相似, 尤其似野牡丹, 所以要分辨它, 除非很熟悉, 否則請用葉分.

毛棯的葉片表面光滑無毛, 無毛又叫毛棯?

佢D毛生左在莖上面. 比較粗硬.

是灌木林的一個主要成員, 香港很多地方都可以找到它的蹤跡.

它的果實是四種之中最大粒, 表面有硬毛, 所以咪叫毛棯!

用螞蟻比較下先. 果實都係唔食得嫁!

睇下花的正面.

地棯

呢四種植物之中, 最易認就係地棯. 佢係野牡丹科的植物, 匍匐在地上, 體形最細小,
雖然花, 果及葉都有野牡丹的特徵, 但從它生長在地上及特細身材便一分分左出來.

花朵細小, 比一元硬幣大一點, 紫紅色花.

葉面有三條主葉脈, 由葉柄到葉尖, 下圖是花蕾.

果實都很細小, 跟野牡丹及毛棯很相似, 尤其似毛棯, 不過果實毛較短較稀疏. 可以吃的!

舖在地面很是好看.

蜘蛛捕食

去到大自然, 見到蜘蛛就有野睇, 牠們行動迅速, 戰鬥力強, 很多時都能捕捉到比自己大的獵物,
基本上被牠見到的獵物都難逃一劫. 前兩天去蕉坑, 又見到蜘蛛捕食, 所以拍下分享下.

每次出蜘蛛多數都係捕食, 因為係最惹人注目, 亦係最吸引人的行為.

佢今次成功捉到一隻比佢更強更大力的黑蟻, 唔簡單!

之後去到蜻蜓池, 蜻蜓池當然係蜻蜓與豆娘的地盤, 不過, 獵食者今天轉做獵物.

被吃的是豆娘, 黃色腳應該係黃狹扇蟌, 我每次見到佢都係做獵物, 莫非佢係弱D?

可參閱上次講蜘蛛獵食的蜘蛛俠上畫, 獵物
上次見到黃狹扇蟌被同類獵食循環不息

螳螂仔

今日放假又去影蟲, 行過時突然見到樹葉上有D野...

成片都滿哂螳螂仔!!

估計係剛出生, 所以留在原地.

因為螳螂會互相捕食自己人, 所以應該慢慢散開.

各有各動態.

一排排, 真係第一次見. 希望唔好兄弟相殘.

大竹象鼻蟲

好耐無咁勤力, 因為昨日去左影蟲, 心情靚靚, 成日都咁開心!
而且除了水浮蓮, 還遇到特別的事件, 印象深刻. 昨天見到這一隻大竹象鼻蟲倒在地上掙扎, 牠屬鞘翅目(即是甲蟲)象甲(象鼻蟲)科, 又叫大竹象或直錐象(圖鑑名字), 但我喜歡大竹象鼻蟲, 型D. 作為生態拍攝者, 我應該拍攝牠被蟻肢解, 搬回蟻巢儲存或享用, 牠應該是降落時失足反轉左, 螞蟻們剛發現牠開始進攻...自從03年後, 我未遇過大竹象鼻蟲, 救牠嗎?

終於, 拍攝大竹象鼻蟲的慾望戰勝了拍攝牠被肢解的想法...先用口吹吹...螞蟻們驚慌四散...我伸出一隻食指輕放在牠上面...牠便捉緊我的食指在上面休息...
注意: 未有對蟲仔有認識切勿摹仿, 以免認錯蟲生危險.

這隻受驚的大竹象, 是食竹為生, 沒有什麼危險性, 我就這樣掛彩了! 牠腳部脛節部分, 是用來緊捉住竹子固定身體, 現在緊捉住我的手指....
牠的脛節原來好尖, 結果開始插左入手指少少滲血...我唔怕痛, 但佢仍然好驚唔放手, 我將牠放近竹旁等牠爬去竹, 等左一陣都唔得, 最後唯有用手拉佢放手, 但又要小心唔好整傷佢...結果手指頭拉時割開左兩條5mm左右的小傷口, 損失少量血, 牠完好無缺, 好彩! 然後放牠回竹枝上, 影完相, 呼.....飛走了! 拜拜!

註: 下圖左邊伸出的前腳最前一段橙色部分便是脛節.

這是03年在海下灣見到的大竹象鼻蟲, 之前一篇網誌說過, 牠的咀在象鼻尖端, 用來咬穿竹的表面, 伸進入內部吸食汁液, 牠全長一吋多一點, 是香港最大的象鼻蟲.

下圖可看牠如何捉住竹枝, 腳尖的附肢用來向上爬時使用, 所以進食不必用.

看! 鉗得好緊呀!!

牠喜歡吃堅硬竹枝.

象鼻蟲的頭部很特別, 很似遊戲機的手掣控制桿, 可作有限度的轉動. 想想米缸內的穀牛及迷你的長吻象鼻蟲, 就像一隻狗跟一輛貨櫃車的比例!