祝大家豬籠入水

新年快樂!! 祝大家豬籠入水, 呢幾日受到台灣地震影響, 上網速度極慢, 幾天沒有上來. 今日回復不少便寫下網誌. 講開豬籠入水, 就要介紹香港另一種食肉植物---豬籠草(Pitcher plant). 豬籠草進化成一個特別的豬籠來捕捉昆蟲, 讓我們慢慢研究下:

它常見於高溫及潮濕地方, 土地貧瘠時生長得更茂盛, R仔家的一區最易找到.
經常行山的朋友就知道, 潮濕的引水道上經常生長了很多. 多是攀緣植物, 上下圖都是引水道.

最特別當然係個豬籠, 豬籠是葉尖生出來的特別器官, 一般可以支持直立. 萬一籠內太多水, 便會支持唔住, 倒左D水出來, 之後又可以直返.

瓶子還有蓋, 防止雨水等進入, 令入面消化液沖淡.

蓋口有向內生的地方, 令蟲仔有入無出, 有些品種還分泌蜜露, 加強吸引力. 而瓶內相當滑, 為食的小昆蟲一進入這個陷阱....死路一條!

瓶內除了水, 還會分泌消化液, 消化進入的昆蟲, 然後吸收, 其實豬籠草的食物, 主要是來自光合作用, 吃蟲只是用來補充蛋白質(主要是氮). 由於它亦是中草藥, 被大量採摘, 現在受香港法例保護, 採摘野生豬籠草是犯法的, 人工種植不在此限, 所以花墟也有豬籠草賣. 裏面D液體是黑色的, 多數是消化不到的昆蟲殘渣.

這一種是大約十年前我與友人行山所見, 於深山之內, 估計是另一種豬籠草,
它只有數厘米長, 相當細小.

阿蟬

呢度當然唔係睇阿嬸果D阿蟬啦, 今次同各位介紹下香港常見的蟬.
第一張係黃斑黑蟬, 通常每年最早出現就是牠, 二三月左右便會發現牠的踪跡, 六月便沒有了, 相當常見的一種蟬.

這種比較罕見, 叫安蟬, 只曾有烏溪沙火車站橋上的玻璃見到一次.

這叫紅娘子/紅鼻蟬/紅蟬, 一般在灌木叢找到牠, 相當常見, 有中藥藥用價值.

大鼻草蟬, 相片顯示不到牠的大鼻, 一般行山路旁都會見到下面兩種蟬在草叢出現, 牠們叫草蟬, 又叫得大聲, 很易可從叫聲找到牠的位置.

呢隻叫綠草蟬, 圖中牠正努力地鳴叫,

牠體型細小, 在我的指頭上可見到其大小.

呢一隻就是香港最大, 亦是叫得最大聲的大褐蟬/蚱蟬. 牠常停在樹上大聲鳴叫, 夏天到處都聽到牠的叫聲, 樹幹上沿聲音看就見到可以牠.

蟬是一種特別的昆蟲, 在外國有一種十七年蟬, 在地底生活十七才爬出地面變成成蟲, 香港的蟬沒有十七年命, 不過生活大同小異, 若蟲生活在地底, 之後爬出地面化成成蟲.

而脫皮之後便剩下外殼, 呢個殼原來又有藥用價值, 就是叫"蟬脫".

蟬脫富含甲殼素、異黃蝶呤、赤蝶呤、腺苷三磷酸酶, 可醫治咳嗽音啞、咽喉腫痛、風疹騷癢、目赤目翳、破傷風、小兒驚癇、夜哭不止等症. R仔老婆先兩日煲來飲就係呢D啦!! 原來唔只我飲丫奴咸竹蜂水...
P.S. 今日見到某好友的網誌, 便令我有寫呢一篇網誌的衝動, 多謝哂, 聖誕快樂.

香港瘰螈

2004年02月23日又係同R仔上左黃龍石澗, 果一日我地係去捉魚仔玩, 點知遇上牠. 牠是目前香港所發現野生兩棲動物中, 唯一的有尾目動物(即是蠑螈), 所以亦叫香港蠑螈.

留意前腳有四趾, 後腳五趾, 腹部有橙色斑紋.

牠是肉食性動物, 食魚仔蝦仔, 甚至會食同類. 下圖見到少少腹部的橙紋.

趾間無蹼, 通常在水底爬行, 游泳則用濶平尾巴左右擺動.

曾經定為香港特有品種, 所以叫香港瘰螈(Paramesotriton hongkongensis), 後來發現香港及廣東沿岸一帶都有其踪跡, 但名稱已經落實, 無得改. 牠是受保護動物, 見到牠千萬不要帶回家啊, 會俾人拉呀!

上面資料大部分來自漁護署的"蛙蛙世界", 基本上都係依書直說. 另外牠只在乾淨淡水生活, 所以若果黃龍石澗太多遊人前往而又污染水源, 結果牠們便會死亡或遷移, 再見不到牠.

今次好在R仔都有印象, 唔係次次都話得我講, 佢唔記得.

黃紋棘腹蟌

睇返2004年3月22日的照片, 果一日我跟R仔及另外兩個老友兼同事行黃龍石澗, 一開始已經遇到茅膏菜, 去到黃龍瀑布又見到呢一隻豆娘. 幾年前開始迷上蜻蜓同豆娘, 牠們飛行時姿態優美, 但又極具攻擊性, 而且又是益蟲, 吃掉蚊蠅等害蟲, 外表夠型, 所以當日一見到牠掉在水中時便立即將牠救起拍照, 想不到這樣又拍到好野. 其實當時我並不知牠是何種類, 經過年多後的今天,
見到舊相, 便去翻閱香港蜻蜓圖鑑, 發現原來是稀有品種, 而且是香港特有品種.

牠屬於山蟌科棘腹蟌屬, 在香港的分佈只有城門郊野公園及大東山(即黃龍石澗), 牠們通常生活於海拔約600米的高山中.

今時今日才知道見到罕有品種, 真有七妹所說的偶然遇上的驚喜, 雖然驚喜已經遲了, 今時今日牠的成分相信已經循環幾次了....

當日救牠時牠已經濕透, 相信牠都捱不了多久, 隨緣.

七妹, 車厘, 黃龍石澗真是好地方, 我一入到去便乜都唔識, 而石澗平穩易行, 我在石澗還曾經遇到香港瘰螈, 拍下照片(第二時出網誌), 而且山澗內有很多小魚, R仔都曾行到黃龍瀑布, 不如明年夏天去行一轉, 一定樂而忘返! 可以話俾譚子慧及黃健知, 佢地係蜻蜓專家, 不過唔知佢有無興趣行下山, 我相信大部分蜻蜓迷而家都有一本香港蜻蜓圖鑑, 抵子慧認叻.
(佢地係漁護署蜻蜓工作小組成員, 有份出版蜻蜓圖鑑)

食肉菜

R仔, 你爸爸好番未呀? 食菜有益, 今次食菜啦! 呢種就係茅膏菜科小毛氈苔, 上次黃龍石澗之行介紹過呢! 它是少數會食肉的植物, 在野外較潮濕的地方便可以找到.

伸出來一條條像毛一樣的東西會分泌香甜的黏液吸引昆蟲的到來, 大隻就無事, 如果細細隻, 刺激到觸毛，就會向內彎曲，把小昆蟲黏住和包圍起來，不幸地我仍然未遇上, 無相片提供.

唔緊要, 睇住佢的觸毛先.

佢係顯花植物黎, 唔信? 睇相啦!

它伸出了一條枝條來開花, 我有幸遇上分享下.

粉紅色的小花都算漂亮.

可藥用, 但詳細資料要查下書.

哺乳類

香港好少見到野生哺乳動物? 人山人海, 貓貓狗狗四圍走, 行山時又會見到牛牛, 馬騮山又有馬騮, 想落又唔似少見, 但數數下到底重有乜哺乳動物? 我找尋了我的相簿, 除了上述, 其他都未影過, 一方面係我以蟲為本, 另一方面係野生哺乳動物多數晝伏夜出, 唔容易見. (除了動物園) 我係指乜動物呢? 係指如豪豬, 黃/赤麂, 野豬, 果子狸, 穿山甲等野生動物. 呢D動物又怕人, 一有人聲便避開, 我曾經在元荃古道行山見到一隻似鹿仔或赤麂之類動物, 但有百多米遠已逃跑掉.
翻看我的相簿及唔可靠的記憶, 都只有呢一隻小鼠(正名叫灰麝鼩), 及一隻死蝙蝠, 沒有其他了. 除了兩棲爬蟲外, 最想看哺乳動物. 奇怪是我對鳥真的沒什麼興趣...怪...不過我又太貪心, 樣樣都想見.

清熱開聲

R仔爸爸病左, R仔更加要小心身體唔好病呀!! 等我同你清清熱啦!!呢一隻就係竹蜂, 亦稱木蜂, 牠們喜歡在竹枝築巢, 在竹枝上鑽洞, 然後住在竹筒.

牠們是以花蜜為食物, 所以像蜜蜂般用特別口器舐花蜜吃.

但他們的口器亦保留了大顎用來咬竹枝築巢, 肥胖的身體像很有攻擊力, 還是不要惹牠為妙. 個人所見, 牠似乎是獨居, 或是三兩隻居住, 因為見過牠的巢, 應該不能群居.

為何題目叫清熱開聲? 原來牠便是中藥咸竹蜂. 當年(03年03月06日)在公司Training, 我因為放射治療的後遺症經常喉沙失聲, 當日又再失聲, 有同事介紹用咸竹蜂沖水, 對開聲有幫助, 便在午餐時間在公司附近藥房買了咸竹蜂, 相中可見牠身上的鹽粒, 看牠特別的口器, 有像舌頭舐花蜜的部分及巨大的大顎.

咸竹蜂放在杯內...實在...令人...想丟掉牠...

好在我有的係好朋友, 對我有益的藥物特別落力, 點會容許我就咁丟掉牠? 好友丫奴仔(化名)大大力, 將咸竹蜂插到散哂, 似乎想我吞哂佢地落肚...一睇枱面的相機, 就知道他的心情多麼緊張, 多麼想同我影低...

當熱水沖落杯內...望落都...唔想飲...

丫奴仔又想到"隔"左D蜂出來, 睇落同茶都差唔多, 飲落...咸竹蜂當然係咸啦!

剩下只有支離破碎的咸竹蜂...嘔...

其實上述誇大左少少, 都唔係咁驚, 不過對於我係後遺症關係, 咸竹蜂對我唔係咁有效. 最後都係去左睇醫生先醫好. R仔, 好D未呀? 請左你食咁多野, 不如幫番你整咸竹蜂?

龍眼加雞

R仔唔鍾意荔枝熱氣, 無法啦, 搵左一輪, 找到另一種請佢食. 荔枝就令我想起龍眼, 再加多一隻雞, R仔, 龍眼雞夠食未? 龍眼雞是一種漂亮的昆蟲, 前翅綠色, 後翅黃色, 平時收在前翅下面.

頭上凸出的角其實沒有什麼用途. 牠屬於同翅目昆蟲, 跟蟬屬同一目, 即是又係用長吸管的口器插入龍眼樹吸吮樹汁.

交配方式比較少見. 圖中見到黃色的後翅.

以前分類學, 以半翅目再分成同翅及異翅兩個亞目, 來分開臭蟲及蟬, 因為牠們是近親, 而且都是用吸管來進食, 所以分成一類. 後來分家, 分成半翅目(臭蟲)及同翅目(蟬)兩個獨立的類別, 兩類雖然相似, 但不難分辨:
同翅目的翅膀則整對前翅相同質地, 斜放在背上有如屋簷, 上面龍眼雞就可見到. 半翅目的翅膀平時平放在背上, 翅膀前半(綠色圈)比較厚來保護身體, 有點像甲蟲, 翅膀後半(紅色圈)則較柔軟用來幫助飛行, 因此稱為半翅目. (借用上一篇的荔枝椿照片)

荔枝

既然R仔開到聲話病左, 唯有搵D野請佢食啦...就食荔枝啦!! 不過一個荔枝三把火喎... 呢幾粒圓圓的波波係乜野呢? 網誌叫做荔枝, 呢幾粒野就係在荔枝樹上面搵到嫁勒. (不過其實龍眼及荔枝等無患子科植物都可以找到牠.)

出世啦! 原來呢樣係蟲卵! 灰色加上兩點紅斑, 都唔係咁好睇, 不過, 初出生係要保護色, 唔可以太色彩鮮艷.

於是, 大家食呀食, 努力食野, 快高長大.

開始有D色彩出現啦! (呢幅相好似一路變身咁, 哈哈)

影張大特寫, 灰色邊加咖啡色, 仍然未到成蟲.

大個女啦!! 我就係圓圓胖胖的荔枝椿成蟲啦!! 而家我在荔枝樹產卵, 延續下一代.

呢一隻就係荔枝椿, 見到佢唔好搞佢呀!! 叫做椿就即係臭蟲, 受騷擾會放出臭味液體, 小心整到成手臭哂!

另一個特點係佢個肚有一些白色粉末, 一睇就認得出.