三個臭皮匠

所謂人多好辦事, 蟲多都好辦事, 幼蟲在自然界角色, 主要係成為成蟲, 及成為食物. 這三隻臭蟲(一般稱椿象是臭蟲, 因為牠們會發出臭味保護自己)在樹上, 合力捉到一條毛蟲.

大家吸吸啜啜,

不過我無查呢幾隻係乜野臭蟲幼蟲.

扮鬼臉

襯自己得閒找相片, 出多幾篇先. 之前網誌曾經見到一種蜘蛛背部有人面斑紋, 因而得名人面蜘蛛, 故名思義, 今次呢一隻, 就是有鬼瞼的斑紋, 故稱為鬼瞼天蛾.

背部鬼臉大特寫, 見到鬼瞼嗎? 書中介紹指有骷髏頭形狀, 似嗎?

牠身體巨型, 有7~8cm長, 見到牠不用怕, 牠是吃花蜜, 不咬人.

荷花?蓮花?

有一次同朋友去影相, 我們在影荷花時, 佢問我: 荷花同蓮花點樣分? 我答: 荷花就是蓮花, 蓮花就是荷花, 不過叫法唔同, 令人搞不清楚.
其實, 令人搞不清楚荷花蓮花的原因, 係因有另一種植物從中作梗, 它們又是水生植物, 同樣在水面開花, 外表又差不多, 連名稱也差不多, 它就是睡蓮.
第一張圖就是荷花(即是蓮花), 因為根部有蓮藕, 花凋謝後有蓮蓬. 粉紅色, 花很大.

蓮蓬的樣子, 上面有蓮子, 其實上圖花中間便見到小蓮蓬, 很像花洒.

這一朵便是睡蓮, 細看之下, 便發現兩朵花其實不太相同, 花中沒有蓮蓬, 顏色多元化, 有紫色, 橙色, 黃色, 白色等等.

其中要分辨兩種花最重要的部分, 是葉. 留心一看: 荷花的荷葉, 由葉柄撐出水面, 凌空架起, 葉脈由葉中央出發, 葉面無裂痕, 可以用來做荷葉飯.
睡蓮的蓮葉則平放在水面, 葉柄不足以撐起葉片, 葉脈亦是中央出現, 但葉面多數有裂縫.

所以, 濕地公園水池內種植的, 便是睡蓮, 葉片只是平浮在水面,

志蓮淨院內也是種了睡蓮, 葉片也是水面. 其實多數觀賞地方都喜歡種植睡蓮, 因為睡蓬一年四季常綠及開花, 荷花一到冬天便會凋謝, 以蓮藕姿態生存, 到了明年春天, 又再長出花和葉, 大家不要再叫錯啦!

七妹, 麻煩你留意有無錯誤, 若有任何錯誤, 通知我立即修改, 謝謝, 哈, 今次七妹面前試下班門弄斧, 我都係靠以前sit堂及出field時所學, 好多都已經唔記得, 只是記得市郊常見植物, 同大家分享下.

建築師

少年時代的我, 最喜歡蜘蛛, 因為就在家的附近便可以找到不同的種類, 而昆蟲則少, 家附近只有蠅, 蚊及蟑螂等害蟲, 牠們不怕人, 反令人怕牠. 現在長大了, 才能自己前往郊外看蟲. 當然, 亦不忘看蜘蛛. 家居附近見到的蜘蛛多數是蠅虎, 即是跳來跳去, 很少結網的種類. 現在在郊外見到的蜘蛛, 多數是結成蜘蛛網獵食的品種, 始終郊外獵食比在市區捉蒼蠅困難. 下面這種蜘蛛比較常見, 牠會用蜘蛛網做成一個大帳篷, 然後住在中央, 我不知道牠捉不捉到獵物.

這是一般常見的蜘蛛網, 像雷達, 覆蓋範圍一有獵物便逃不出來.

這種蜘蛛喜歡住在海邊的石頭, 常在石頭中間找到牠.

這種蜘蛛是其中一種金蛛, 一般金蛛的前後腳會形成 "X" 字, 牠喜歡在網上用蜘蛛絲做一些斑紋.

每年春天潮濕時, 霧氣沾在蜘蛛網形成小水珠, 常令我著迷.

就像一串串的寶石掛在網上, 非常好看.

連蜘蛛都怕了霧水, 一早離開了.

報喜

一般蝴蝶通常最容易見到的, 是美麗又飛來飛去的成蟲, 所以亦是最易辨別品種的時期. 但是蟲卵及毛蟲就難以相認, 除非有昆蟲家收集來飼養長大, 才能確定品種. 所以除了最常見的數種品種, 我只認識成蟲. 多數毛蟲我影了相, 也不認識, 要查好耐書. 今次介紹一下一種香港非常常見的蝴蝶----報喜斑粉蝶. 台灣稱為肩紅粉蝶, 即是肩頭紅色的意思. 這種蝴蝶冬天也會出現, 一年四季都有牠的踪跡, 蟲卵黃色, 很可愛.

幼蟲時期一群出現, 真的有點嚇人, 黃啡相間, 加上毛毛, 令獵人無胃口.

吃到夠了, 變得圓圓的身體已經不能走動, 要結蛹啦!!

牠們一群的出現, 一群的結蛹.

有時令一支樹枝上吊滿了蟲蛹, 我眼見到便有七到八個吊著.

我長大啦!! 認得我嗎?

勿瘋

看了今篇網誌, 請勿看到亂七八糟, 令自己瘋了! 一般人都會怕蜜蜂, 動物界亦然, 所以有些昆蟲會扮成蜜蜂的外表來嚇人, 當中最神似的是食蚜蠅. 食蚜蠅的名字好像會捕獵蚜蟲, 其實只有部分幼蟲會食肉, 而大部分成年食蚜蠅都是食花蜜為主. (下面的照片, 蟲仔都叫xxx食蚜蠅, 即是不同品種)
第一種食蚜蠅, 其實很像一般的蒼蠅, 只是披上蜜蜂顏色.

這種食蚜蠅很常見, 但又不常見到. 點解? 其實佢係好鍾意飛, 一飛就在半空中懸浮, 行山時經常在身邊慢慢飄, 其實牠以高速拍動翅膀停在半空. 你一接近, 牠立即高速飄開, 只有牠停下休息, 才能看到樣子. 牠叫黑帶食蚜蠅.

呢一張新加既, 係今日(19/11)於城門水塘拍攝的黃腹狹口食蚜蠅, 同上面果隻很相似, 但主要分別係背部的斑紋不同, 腹部紋亦略有不同.

這一隻大頭大眼的食蚜蠅, 一對大複眼各佔去頭的一半, 肥胖的身體, 經常飛入我公司, 各兄弟實見過, 其實佢又係扮野. 牠叫小花虻, 或叫棕腿斑眼食蚜蠅.

下面呢一隻唔係食蚜蠅, 叫南亞寡鬃實蠅, 是人類大敵, 但我們可能未見過佢, 因為佢只會同農民作對, 在農田便可以見到牠的威力, 有朋友做漁農處, 見過一個大瓜內部已經被吃掉, 剩下外殼, 裏面滿是牠們, 超過250種農作物都是牠的食物, 能超大量數目出現, 破壞食物, 不過牠其實除了斑紋外, 體型並不似蜜蜂.

呢隻就唔係蠅, 亦唔係蜂, 不過都生成一個蜂樣, 英文名叫Wasp Moth(意思係黃蜂蛾), 佢係蕾鹿蛾, 飛蛾天生就係別人的食物, 唔扮下野, 點得呀?

至於呢一隻係食花蜜的真正蜜蜂, 同之前果幾隻似唔似呢? 其實要分辨出蜜蜂不難的, 同上面幾隻主要用翅膀便可以分出, 飛行中睇唔到就無辦法啦, 蜜蜂有四隻翼, 而上面果幾隻係雙翅目昆蟲, 只有兩隻翼. 雙翅目昆蟲有兩大類, 係蚊同蠅. 佢地第二對翅膀已經退化成一對平衡棍, 主要係平衡身體. 鹿子蛾雖然有兩對翅膀, 不過都被人一眼看出唔係蜂, 因為佢第二對翅膀都好細.

不過在動物界裏係無永遠既強者! 扮成蜜蜂又點呢? 真的蜜蜂都成為蜘蛛的食物,其實無論點既樣, 動物都有其天敵, 嬴得一時, 嬴唔到一世!

但係食蚜蠅扮成蜜蜂最大既著數係嚇人, 很多人一見到佢便當佢蜜蜂, 走都走唔切!

重遇

又係今日新料, 今日去蕉坑, 已經少左好多蟲, 唔知天氣唔好定係已經到冬天...但我見到一條熟悉的"蟲仔", 2001年十月, 我同Lawbut去左龍翔道觀景台影夜景, 點知在旁邊的夾竹桃叢遇到佢. 佢有成隻手掌咁長, 身上有一對眼形斑紋扮蛇, 正在快樂地食夾竹桃. 登登登....櫈, 佢就係夾竹桃天蛾的幼蟲, 是 "巨型的蟲仔" . (呢張係當年舊相)

今日見到佢地, 佢地都係吃得好開心, 叫得做夾竹桃天蛾, 佢當然喜歡食夾竹桃啦! 不過今日唔係食夾竹桃, 而係夾竹桃科既長春花. (我都係今日至知)

今日見到牠們都差不多是終齡幼蟲*, 圖中是我的尾指, 其實比五年前見到的細條左. (*幼蟲最後一次脫皮後叫終齡幼蟲, 即不再脫皮, 是等待結蛹或變成蟲)

呢隻開始變色, 食飽D就係時候結蛹!

佢地既體型絕對唔野小, 俾雀仔見到呢.....食到飽飽....

佢地位置相當開揚, 就在路邊, 而且食到D長春花謝哂, 成地都係好似木瓜核的蟲屎, 想見唔到都好難...真擔心佢地就在路邊結蛹, 唔知係唔係結蛹過冬呢? 係就仲要等到出年先破蛹. 
唔好睇錯, 下面D花係千日紅, 牠們不吃的, 只不過剛好種在下面.

俾大家睇下長春花先, 好常見, 周圍都種植左一些, 不過記住唔好食呀!!! 夾竹桃科有毒嫁!!!

係咪好心急想知夾竹桃天蛾係點樣呢? 夾竹桃天蛾很漂亮, 一身迷彩圖案, 飛得很快, 一對翅膀拍動速度極高, 能像蜂鳥一樣凌空定著身體吸花蜜, 一般天蛾都是這樣進食的, 不過夾竹桃天蛾並不常見, 多數只有牠停下才能相見, 下圖是牠飛入我公司, 停在地上, 被我捉住影一輪相後放生, 都係2001既事了. 係唔係好靚仔呢? (舊相)

書上的圖片.

盧吉道

新鮮熱辣, 今日同父母上山頂行番落薄扶林水塘, 山頂是蕉坑之外, 我最常前往影相的地方. 山頂與蕉坑交通方便, 遊人數量不會太多, 蕉坑有多種人工種植的食用植物吸引各種昆蟲, 而山頂則擁有天然的原生樹林, 生物多樣性更強, 但遇上蟲蟲的機會需要靠更多運氣. 沿著盧吉道的小徑, 欄杆上已經有很多毛蟲走來走去, 今次遇上泛光紅椿捉到兇惡的大黑蟻, 本來覺得看了太多相似的圖片, 但今日見到牠又忍不住...

螞蟻已經倒地, 單單一條吸管, 到底如何獵食? 獵物不會掙扎嗎? 一插入身體便被麻醉? 強如力量充沛的大黑蟻仍然不敵, 我都唔知牠獵食的方法, 只見到牠進食中的情況. 但我一直都覺牠們進食的方法很優雅, 乾淨企理, 當年我的畢業論文就是有關半翅目昆蟲.

當然, 其他進食方法我都欣賞, 見到螞蟻像睡著了一般, 而身體一點一滴的精華慢慢被吸取, 又有點可憐蟻仔...

倒下了

春去秋來, 每年昆蟲都有一次大滅絕. 大部分的昆蟲成蟲都會死亡. 但牠們又各有方法渡過寒冬. 然後明年, 牠們的下一代又再活躍起來. 生命就此一直延續. 這隻大褐蟬(香港昆蟲圖鑑稱之蚱蟬)是早兩年秋季拍攝, 跟近日天氣差不多.

有如童話故事, 夏天只顧鳴叫及吃喝玩樂, 秋天便無食物死亡, 其實, 食物是有的, 可惜時間已經容不下牠.....牠的眼中, 生命只剩下...前來吃掉牠身體的勤勞螞蟻...

另一隻亡蟬記載在十月其中一篇網誌: 休止

斑腿泛樹蛙

呢隻係早兩年在嘉道理拍攝的樹蛙未成年體, 當時牠躲在草叢裏.

偶然機會下, 這樹蛙隨泥土到達了市區的花店, 嚇了花店老闆娘一跳.

又偶然之下, 最後由我帶牠到蕉坑放生.

其實蛙類係昆蟲天敵, 但是蛙最愛潮濕, 一般午間是見不到青蛙.

牠算是撿回一命, 擺了一些"舖士"作回報, 其實牠並不罕見, 只不過晚上才出現.

真的想多遇上, 因覺得牠們體態都很優美.