膠粒毛蟲

跟我讀同一所學校的朋友, 一定見過呢隻蟲, 佢每年夏天, 在學校的欄杆上爬來爬去, 我以前並不知道是什麼蟲, 只知牠是蝶或蛾幼蟲, 現在終於知牠叫蝶形錦斑蛾.

牠最特別的地方, 當然係佢既外表, 身體一格格, 就像是模型玩具一粒一粒砌出來, 而背部有六粒紅色膠粒, 其餘都是黃色. 古怪外型加上圓圓胖胖的身體, 走路又慢又笨, 常引得我放學後在欄杆看上一段時間. 咁, 佢咪成日俾人食? 原來佢身上的保護膠粒已經通知左敵人唔好食佢, 因為佢有毒, 除了唔好彩遇到未中過招的敵人, 一般都無乜人食佢.

呢隻就係成蟲, 佢係雌蟲, 真係靚左好多呀, 書介紹佢身體含山埃毒, 而且雄蟲很少見, 我唔知有無見過呢? 可能見左都唔知.

堂食

2001年12月8日晚, 當年原來十二月都有螳螂, 當日我捉了草蜢仔回來餵牠, 當年我應該是在東涌捉回家飼養, 到長大後便回東涌放生, 印象中試過兩次, 今次綠色, 另一隻是啡色的. 但已經忘了何時捉牠, 只是牠進食時影相.

螳螂獵食時, 採取守株待兔方法, 慢慢等候獵物接近, 然後突然鐮刀一伸, 已手到拿來. 牠們的消化力很強, 基本上除了翅膀外, 獵物是一口一口的整隻吞下, 若牠並不肚餓時, 腳便會不吃. 我有時間便往山邊捉草蜢仔回來餵, 否則在家附近便只有蒼蠅及蜘蛛.

下面連下顎都清楚見到. 螳螂是殺手, 不論是否同類都會吃, 除非空間很多, 否則不能同時飼養多隻, 而且要有樹枝給牠爬行, 亦要留有空間倒吊, 牠們最喜歡倒吊休息, 而當牠們脫殼時, 亦是倒吊而出, 不夠空間便不能順利脫殼, 我曾經見到, 可惜沒有拍下照片.

到了2002年4月16日, 牠長出了翅膀, 我便放回東涌的野外, 都是我的過失, 飼養缸不夠空間, 牠羽化時翅膀弄皺了, 做成這無可挽救的過失, 我真對牠不起! 螳螂屬網翅目昆蟲跟蟑螂同目, 圖中便可見到好像網一樣的翅膀, 不過近年已經分開, 螳螂屬螳螂目, 蟑螂屬蜚蠊目. 想知道一隻昆蟲是否成蟲, 最易是看有沒有翅膀, 當翅膀長出便屬成蟲, 不再脫殼. (除了沒有翅膀的昆蟲如蟻, 跳蚤等.)

不知是否養得太久, 樣子傻傻的.

大金龜

其實我很喜歡甲蟲, 牠有堅硬的外殼保護, 好像很笨拙, 其實牠們行動速度高, 而且一般都很大力, 最大力的昆蟲都是由甲蟲品種(鞘翅目)包辦.

不過甲蟲要生活在比較乾淨的環境, 所以能見到的機會已經少得多, 而有些巨型的品種, 更加少見. 我小時候曾經見到一隻巨型的牛糞金龜, 現在只剩下見到一兩厘米的小型品種. 牠們的前翅硬化成保護殼, 後翅比較大及用來飛行. 我最喜歡獨角仙, 香港只有類似的姬兜蟲, 但我都未見過. 另一類喜歡的是鍬形蟲, 即是有一對大顎的甲蟲, 香港就我所知有四種, 我見過其中三種, 剩下一種仍要努力, 只知有人在大埔滘見到, 希望有緣相見.

所以上次在大埔滘遇到這一隻大甲蟲很興奮, 她似乎是母牛糞金龜.

回想以前, 自己真的很瘋狂, 曾經養過小獨角仙, 小鍬型蟲, 螳螂, 龍虱, 水蝎(紅良華), 仰泳椿, 桂花蟬, 蜘蛛, 蜻蜓若蟲變成蟲, 蠶蟲, 竹節蟲, 麥皮蟲, 蝎子, 魚蛉等等, 有些買, 有些捉, 可惜以前無數碼相機影相, 而且又無微距鏡頭拍攝, 唔係可以做紀念. 現在人懶了, 只是養了一缸魚, 仲要很少打理.

鐵掌水上飄

佢唔係裘千仞, 佢係屬於半翅目昆蟲的水較剪(或稱為水黽), 叫得半翅目, 即係又要啜啜下, 牠們生活在水面上, 其實牠們有翅膀會飛, 但是很少飛行. 牠們在水面捕獵掉在水面的昆蟲吃, 下圖是正在進食的水較剪, 前腳夾在口器吸啜(04年11月3日拍攝於西方寺, 當日同倫及肥劉去影相)

呢一隻在食蟻, 到底水較剪點解會可以在水面上面飄行? 原來牠們身體輕盈, 在腳尖生了一排毛毛, 像毛擦一樣保存空氣加強浮力, 伸展得很長的腳, 亦有助於利用水面的張力, 因此牠們便可以"水上飄"了

呢一隻死左, 上下呢兩張相於03年5月14日與阿星在中港城上面的公園拍攝.

下面兩張圖是07年1月21日於香港仔水塘拍攝, 圖中可見到牠們能群體生活, 不過牠們會自相殘殺, 只要一不小心, 便會被同伴吃掉.

不過佢地在流水水面上跳動倒是非常有趣, 見到牠們的長腳夾夾下, 的確不負"較剪"之名.

再見瘰螈

今日去川龍的山溪影相, 一去到見到係川龍村屋後的一條小溪, 冬天已經乾了大半, 加上位於村屋後, 很多家居污水排出, 雖然溪水不至於污黑色, 但有點臭味及水中有大量水藻, 即是有很多有機污水引致此情況, 不過往上游走便較乾淨, 倒拍攝到不少溪流風光. 最令我興奮是一村屋後的其中一個小水潭內, 見到香港瘰螈. 這個位於下游的小潭尚算乾淨, 相信為此瘰螈才能生存. 從水面看, 香港瘰螈略帶啡色.

忍不住又再捉上來影下相, 一離開水便變成深啡色.

企定定影下相.

今次記得影下腹部紅色斑紋, 然後我將牠放回附近一個比較大及深水的水潭. 其實這是不對的, 不過我當時見牠身處的水潭似乎不太好, 才下這個決定.

點知錯有錯著, 影了一個小時左右相, 回到此水潭時, 村屋正排出一些白色液體, 我不能確定是什麼液體, 沒特別氣味, 又不似洗澡水.

在溪水中好像雲霧一樣很好看, 不過對生態影響卻不能估計. 也許, 瘰螈已經習慣了...

大家可參考12月22日所寫的網誌: 香港瘰螈

香港瘰螈

天胡荽

就聽七妹所講, 睇下乜野係天胡荽啦, 又係傘形科草本植物, 其實外表及生活同崩大碗差不多, 不過印象中無崩大碗分佈咁廣泛, 個人覺得佢生活在比較潮濕的地方, 因為見親佢多在較濕的地方.

跟崩大碗同類形匍匐植物, 睇真下葉緣有裂紋, 跟崩大碗有點不同, 而它的葉片比較細. 它亦是中草藥, 有祛濕清熱, 化痰止咳功效, 亦有利尿消腫之效, 不過我不知道點煲涼茶. 網上找到資料: 天胡荽含黃酮詌，酚類，氨基酸，揮發油。本品對金黃色葡萄球菌，變形桿菌，痢疾桿菌，傷寒桿菌有抑制作用。(資料來自http://www.chiusang.com.hk/searcheng/p0012.htm)

又出張崩大碗比較下.

飲涼茶

講開七妹要飲崩大碗, 不過崩大碗到底係乜東東? 其實佢係傘形科草本植物. 佢外形像一隻碗, 而又崩了一角, 因而得名. 匍匐性植物, 即是在地面像網絡四處伸展, 而它亦非常"粗生", 幾乎有泥土就可以生長, 其分佈跟酢醬草差不多, 四處都可以遇到.

記得細細個時, 街頭常見到有人帶住一個五加侖的蒸餾水樽, 裏面裝滿深綠色濃濃的汁液, 就係崩大碗了. 它是中草藥物, 聽說做法簡單: 搗碎崩大碗加冰糖煲一煲, 再冷卻加冰飲, 看起來很難喝, 其實只有濃濃的草青味.

而它是寒涼草藥, 一次過不宜飲用太多, 有些人飲用之後更會出現頭暈徵狀, 而中醫亦有指孕婦不宜飲用, 因藥性太寒涼會影響胎兒, 當然都是指不同體質有不同影響, 不過其寒涼藥性可以對抗燥熱, 尤其是因熱氣引起的牙肉腫痛特別見效, 不過近年來已經很少見到有得賣, 我至少十年無見或飲過了, 可能太cheap吧, 但是自己採摘又怕骯髒...

認得佢嗎?

佢就係之前介紹過既荔枝椿若蟲. 在大埔碗窰偶然見到. 佢隻腳行路一拐一拐, 好像帶住什麼...

看到了, 原來有隻蟻!

佢就是黃猄蟻! 咬住獵物死不放口, 呢次真係死左都不放口... 到底小荔枝椿脫殼時, 黃猄蟻會否連殼甩掉呢? 我也不知道.

枝條上的隱士

叢林中總是躲避了很多看不見的蟲仔, 所以我常為了拍攝牠們, 便在草叢中發呆, 一來可避免嚇倒牠們, 令牠們飛離我身邊, 二來當牠們習慣了我的存在, 牠們又會活動起來, 這時, 便是發現牠們的最佳時候. 這篇與上一篇草蜢都是在東涌往馬坑涌的樓梯旁的草叢(不上涼亭)拍攝, 這一隻是一種半翅目昆蟲的若蟲, 當時我坐在一塊石頭時偶然在身旁發現牠, 牠居然跟植物的豆莢幾乎一樣! 可惜我也不知牠是什麼蟲.

青色身體, 啡色的邊及觸角, 當時若不是牠向上爬, 我也發覺不到牠的存在. 而且當牠發現我在拍攝牠, 牠一動也不動, 融入了周圍環境....為了讓大家可以一看正常的圖片, 大家又可以試試找動物, 下圖才開估, 我唯有做兩張相片出來比較這種笨方法, 請原諒.

沙灘中的隱士

除了昆蟲外, 其實很多動物都會偽裝, 找到另一張相片又有差不多效果, 這一種蟹仔, 腦袋圓圓, 跟和尚蟹差不多, 不過全身啡色, 跟沙一樣. 不過我見不到牠識唔識和尚蟹的必殺技.

和尚蟹的樣子, 身體像剃了頭般青青藍藍.
(可參必殺技:必殺技)

下圖圈出蟹仔的位置.

你睇我唔到

昆蟲界係你食我時我食你, 所以大家都要想各種方法去避免被人吃掉. 一般最常見的就是模擬周圍環境, 好多都唯肖唯妙, 像竹節蟲, 牠根本就是樹枝, 不過牠的照片仍然在整理中, 所以俾住草蜢大家睇先. 草蜢都是素食動物, 有些草蜢外型並不模擬植物, 今集網誌只介紹幾種, 第一種叫螽蟴, 香港叫長角草蜢, 觸角很長很軟, 牠們扮葉片非常似, 而且有綠色及啡色.

圖中呢隻啡色螽蟴, 若不是跳出路邊, 在枯葉中相信很難找到牠.

這一隻是短角草蜢, 觸角短小, 不過其綠色與啡黃色斑紋在草叢中非常有效偽裝成草,
陽光之下拍攝, 的確不易見到牠的蹤影.

沒有陽光下, 幾乎與周遭打成一片, 驟眼看根本見不到牠.

這一隻草蜢是啡色的, 所以牠們自然多在啡色植物上活動, 令捕食牠們的獵人看不到牠,
但是當牠們一動, 便會暴露行蹤, 所以牠們仍然有第二招絕招, 就是跳走.

不過牠們在自然界的角色是食物, 將植物能量傳給其他高級消費者, 偽裝似乎都係盡量"做D野".
原來佢地既偽裝好成功, 就等我都"做D野"幫下大家.

有殺無賠

Lawbut兄喜歡蟲仔, 又出一篇蟲仔先, 今次我為攝影而犧牲, 一直都希望拍下蚊叮人的照片, 但又有邊個願意俾蚊叮? 而且俾蚊叮都唔一定影到, 隻蚊吸血時都不會任你影, 有東西接近便飛開, 何況影微距? 就是肯犧牲, 叮住自己身體, 很多位置亦不容易影呢!
呢一隻笨白紋伊蚊居然停在我的左手手背, 第一是被我發現, 幸運! 第二是牠的位置非常合適拍攝, 我可以將相機沿手臂推近拍攝, 右手單手影相都夠哂定, 第三牠居然警覺性奇低, 相機跟牠相距只有幾厘米都不飛走, 注定要我影下牠! 相中所見牠的口器已經插住我的手背, 吸血及傳播病毒同時進行, 蚊吸血不是為飽肚, 而是為下一代, 雌蚊需要以哺乳動物血液蛋白質做卵子, 所以只有雌蚊吸人血.
當然不是所有品種蚊都吸血. 而吸血過程要注入其口水防止血液凝固, 與及要減壓協助吸血, (情況如飲紙包飲品, 壓力令人不能一口飲到尾, 要放口入氣)病毒就由此進入體內!

為免牠吸我的血再產卵, 而影完相後, 牠仍然貪婪地吸血唔肯走, 牠唯有付出生命作代價. 在我的掌心告別世界, 為何牠叫白紋伊蚊? 其實牠胸背部有一條直白色的紋,
大家有機會被牠叮的話可以細心觀察牠, 我幹掉牠後, 手背已經被叮了一段時間, 紅腫起來, 痕了一會...

Lawbut喜歡製作特輯, 呢次合口味嗎?

三分顏色上大紅

呢D係真真正正的大紅花! 又等我同大家分享下賞花的樂趣. 不過唔講唔覺, 原來公園既大紅花係有幾種, 以下幾種是在公園相當常見的大紅花, 它們都屬於錦葵科朱槿屬植物,  所以大紅花都會有人叫朱槿.

以下呢一款, 咪以為係大紅花未開呀, 其實佢叫懸玲花, 佢外表好似一個風玲, 所以叫懸玲.

佢就係唔開既花, 花瓣同花蕊其實同大紅花大同小異. 

至於呢一種呢, 又唔好以為係謝左,爛花瓣, 吊吊下既大紅花, 其實佢叫吊燈花, 天生就係咁樣吊住開花, 真係好似一盞吊燈!

平時去開公園, 通常都有一些植物, 好似來來去去果幾種, 其實留心睇下, 都有不少新發現, 好似之前我去東涌新足球場踢波, 附近公園內所種的, 已經不是以往所見的石栗或鳳凰木之類, 反而係一些在市區很少見的種類: 有藍花楹, 楓香, 土沉香(牙香樹), 桃花心木及刺桐等, 等得閒要去影下相, 拍下一年四季花期果期, 到時又可以同大家分享. 講開藍花楹, 我第一次見到它是在和合石某山頭, 由於很像鳳凰木但又見到有藍色花, 我起先還懷疑有藍色花的鳳凰木, 後來才認識到藍花楹, 所以印象很深刻. (鳳凰木的花是紅色) 唔知種植在東涌公園的情況下, 土沉香會否結果呢?(下圖是攝於大埔滘的土沉香果實)