2013京都之旅夾夾機篇

其實今次去大阪, 玩夾夾機的錢比上一次到東京玩的少, 一來匯率方面打了八折, 二來我們早出晚歸, 酒店附近又沒有夾夾機, 不像新宿那麼方便, 只是在晚上在道頓堀附近閒逛的時候, 遇到夾夾機舖才玩了一會, 另外我們都以鬆弛熊為目標, 基本上很少會夾其他公仔, 所以少了用錢, 話雖如此, 我們還是玩了大約港幣一千二百到三百左右, 即是約一萬五千円左右.

這是在鬆弛熊專門店前的一部小夾夾機, 我們玩了兩次, 發現呢部機其實係夾唔起粒頭(或者我功力不足), 於是改變策略, 在出口邊利用夾的重量挖旁邊的公仔出來, 再試一下, 果然成功, 然後成功連夾幾隻! 最後我們共玩了一千二百円夾左五隻, 不過最後一天再去時, 見到有一隻好易, 卻玩了三次才成功...

不過計返條數, 為何現在玩夾夾機, 目標明確, 用錢差不多都是玩千多元港幣, 反而收穫比以前少左呢? 記得第一次在東京時玩了只是約一千元左右便夾了一床公仔, 於是回想一下這兩次日本之旅, 我發現主要是因為現在我們玩的手法提升左, 不像以往要四處看, 等待機會高的夾夾機才入錢玩, 而是當一見到是喜歡的鬆弛熊公仔, 只要看來有一定機會的夾夾機, 甚至有些看來有點難度的機, 我們一般都會入500円試玩玩, 因為每次入500円可以夾6次, 比較著數, 而且足夠試下部機到底個夾有無力, 或者夾夾可以伸到幾低等等, 實牙實齒去夾, 結果相比較之下, 用多左錢而收穫少左, 不過好在日本玩的夾夾機多數都比較老實, 夾夾通常都比較有力, 而且店員都會幫下手擺位, 難夾極都有個譜.

但像下圖的吊繩公仔我就未玩過了, 因為較剪很難成功, 而且要凌空剪幾次才能剪斷條繩, 不過我見過有高手利用較剪扯斷條繩, 我自己就無信心玩.

今次大公仔好少夾, 因為看到的公仔, 都是擺放得很難夾到, 有一間機舖試玩了1500円都全軍覆沒.

我玩呢一部玩到好失敗, 用了1500円, 即18次, 但只成功夾到右邊一隻豬鼻雞, 當中最尾幾次是夾熊仔, 不過同樣失敗左, 不知為何, 個夾其實幾好力, 偏偏夾來夾去都不成功.

左邊呢一種玩左500円, 失敗收場, 那隻被繩扯實的熊仔, 就是個夾推到正, 試左6次都係郁都唔郁.

反而呢一部個夾彎彎的像個吊鐘, 而且成個夾搖搖下, 卻成功2次就夾了2隻公仔.

呢一部又是極難玩, 前後玩了11次都夾不到隻雞, 不過只是入左500円, 因為有5次是我們夾到大公仔之後, 將剩下的次數轉過來這部玩.

太太手抱的大公仔我們一共夾了一對, 其中一隻夾兩次, 另一隻夾三次就成功夾到, 想不到這一間店, 大夾好好力! 可惜當時沒有影相.

事後補返一對公仔的照片, 夾呢一對公仔好易, 因為我們早前學了個新方法, 就是找一些著力點去夾, 例如啡色熊的左手拿花, 白色熊右手拿袋, 只要成功將夾夾插入去牠們的腋下的空間, 很容易便可以被個夾勾住, 幾大隻公仔都好易拉到出口, 所以啡色熊夾了三次, 而白色熊只是夾了兩次, 便成功令牠們掉到出口, 不過每次店員都暫時不放回公仔, 而是要我們將剩下的次數轉玩其他機, 減少被我們夾哂大公仔, 結果全部在上面果一部機蝕返, 而我們只夾了一對大公仔便算了, 無謂重覆.

這是在天滿橋站上面商場玩了一次, 因為見到100円可以夾三次, 就夾了三條食物, 好易玩.

呢一部就無試, 影下相而已.

呢部好像玩了幾百円, 成功夾了兩三隻小的熊仔.

盒裝玩具無玩過.

以下呢一間夾夾機店比較難搞, 店內兩部鬆弛熊機都有玩過, 先後都夾了500円完全失敗, 個夾只是剛剛伸到底, 而且無乜力, 古惑的夾.

呢張係手機拍攝, 所以相機框不合比例, 我沒有為手機再做相框了, 下面這一部的夾夾比較有力, 不過它是90度轉動的, 所以很難就位, 我好像玩了1000円, 夾了兩隻Kitty.

最後呢幾張係Hep five世嘉夾夾機店拍攝, 呢一部機看來個夾好大, 不過很難夾起, 玩左一次試試, 唔得就無再玩了.

呢一部就玩得好成功, 由於我們有一對蜜蜂鬆弛熊, 只剩下蜜蜂豬鼻雞未有, 所以一見到就要試, 先試左一次之後發現夾夾幾好力, 而且第一下將豬鼻雞推到出口邊, 更令公仔背部條招牌索帶轉到剛好伸左出來, 勾索帶是夾公仔其中一招絕招, 因為如果成功勾到索帶, 就算大大隻公仔都好容易釣出來(當然還要取決於夾夾有無力), 不過香港好多公司都會用膠紙貼住條索帶.

果然第二次我就成功插中索帶, 以這部有力的夾夾機來說, 即是成功左九成, 太太早已準備好相機拍攝, 所以全程紀錄哂.

果然成功成隻釣起! 是勾住招牌的索帶釣起而不是夾起.

終於可以儲齊一套! 200円完成, 因為試完一次之後有信心, 唔駛入500円.

之後去了旁邊最新鬆弛熊夏威夷系列的夾夾機, 見到大大隻白色熊爬在出口邊無人理, 大好機會無理由唔夾, 而且是我們的目標公仔, 唔駛考慮, 立即去馬.

留心睇清楚, 雖然索帶外露, 不過如此位置是最方便夾夾將成隻夾起的角度, 因為夾夾一般都沒有太大的力量, 但當公仔位置剛好頂住個夾時, 無力的夾都有時可以成功夾到. 另外,下圖右邊都有一條索帶在結他上面, 我之後利用它又釣了一隻白色熊, 其實我以為是結他手, 誤中副車.

所以只要將夾夾插在頭頂的耳邊, 或者兩腿中間都可以輕易夾起並平衡到不會掉下來.

看! 夾第一次就成功了!

最後這部機, 我們玩了約1500円, 利用夾索帶方法及拉扯, 前後夾了4隻公仔.

今次的夾公仔全家福!