京阪神之旅最後一篇了, 自從學識玩夾夾機之後, 每次去旅遊都成為了行程節目之一, 看今次的收獲! 今次計落大約玩了千五元港幣, 主因是今次行程時間長, 而且比較多自由時間, 我每次一得閒便會去看看, 又試玩了不同種類的禮品, 所以比之前玩多了.
首先是這一個頸鍊, 基本上需要逐下夾出來, 因此每次都要夾十多次才成功, 平均要百多元港幣一條, 不過Lisa很喜歡, 有得玩而跟買也差不多, 無乜蝕錢.
第一次玩算是帶點幸運, 約2~3次左右便推了中間的盒仔出來.
日本最好的地方是夾夾一般都較有力, 比較公道, 用多一些錢便可以成功, 再唔得搵職員幫下手, 佢見你係遊客, 多數會幫你手, 結果呢次用一千円多2~3次便成功!
頸鍊設計很精美.
之後第二天在天保山海遊館附近的一間夾夾機.
居然隻大鬆弛熊咁簡單放在機內, 左右都沒有圍欄, 200円夾一次, 難道個夾無力的? 結果夾了一次, 發現個夾都幾好力, 再入500円夾三次, 結果只夾了兩次就成功夾走了啡色熊, 還剩下一次, 通常要轉去另一部機玩, 但今次職員居然立即換上白熊讓我們繼續夾.
於是夾完呢一下之後, 再入多500円玩三次, 夾到第二次成功勾到索帶, 但吊住個勾卻沒有掉下去, 要職員幫忙拆下來, 職員放回在機上面要我再夾一下, 本來應該夾一次便可以.
可惜夾完卻只是打斜, 仍然不肯跌落去, 要再入多200円多夾一次才成功, 結果共用了1400円, 夾了兩隻大公仔都算OK啦.
在梅田鬆弛熊專門店夾了幾百円, 只成功一粒...
在Hep Five玩呢一部最難, 當時見到張紙有人玩了一半放棄, 結果我們共玩了二千幾円, 玩呢一部機運氣多過技術, 上面的鐵釘搖搖下, 難以控制, 至衰係唔順氣, 明明張紙快要斷, 偏偏死唔斷氣, 本來我玩了千五円已經放棄, 行一圈見無人玩, 再入多500円仍然唔得, 決定唔再玩, 但大家覺得可惜, 之後Lisa再試了幾下, 張紙終於在最後一次, 自己頂唔順斷埋, 但其實最後一次都未玩完, 浪費左一次, 激死.
呢一部執人死雞, 夾一下夾就到隻鬆弛熊.
呢一部好抵玩, 100円一下, Lisa先試了一次覺得OK, 於是入500円再玩, 最後用了600円共7次便成功夾了1隻大公仔.
這是第二天的收獲...(手機照片沒有做相框)
呢張係自由時間玩的, 一個人玩時經常忘了影相, 呢一部就夾左幾次, 前後約千多円, 夾了四隻.
吃完一蘭, 早上夾了兩隻, 這個萬聖節南瓜系列只欠白熊, 300円搞掂.
玩的時候忘了拍攝, 這一隻用了近2000円才成功, 不過是會動的公仔, 都OK.
在神戶的世嘉店, 只用了八百円便夾到兩個, 可惜之後夾個鬆弛熊煲, 玩了一千円都失敗.
去神戶呢一日只有幾樣收獲.(手機照片沒有做相框)
第八天行程的自由時間, 又去心齋橋的世嘉玩了一會, 下面兩部機, 玩之前我看了好一會, 才決定好策略去玩, 結果想法沒錯, 第一套匙及叉, 只用了五百円便成功, 當中還有包括幾下測試, 而兩部機都係玩完之後, 職員都不再加返上去, 並且唔准人再玩, 而是在研究如何擺放才難以夾到! 真的令我很有滿足感! 哈哈! 可能發現被我破解了這部機, 這套叉香港賣約150元呢!
下面這一張是職員放上去測試時拍攝的, 因為玩之前沒有拍攝, 我玩完上面部機, 覺得有相當把握, 結果玩下面部機時只夾了兩次便成功, 加起來才700円, 最賺呢兩部, 其實沒有什麼大不了的方法, 只是要小心落夾的位置, 右邊夾要準確勾住盒子的右下角, 但左邊不要勾到盒子, 因為平衡兩邊力會令盒子跣向上, 第一下就跣向上少少, 第二下成功勾中, 升高後向下跌, 便一彈直落下面!
當時職員一行開見我埋去影相, 可能以為我又再玩, 立即回來收起個盒, 笑住講日文, 大約係唔玩得之類啦, 然後收埋個盒唔俾玩, 我手拿住一盒都唔玩住了, 所以最後先拿去給爸爸保管收獲, 才再去玩過, 不過之後一直到離開, 職員都唔入新貨了, 仲拆開啲螺絲試位...無得再夾多一件.
呢一部見到有人玩過, 其中一盒吊了一半出來, 立即執死雞, 而且200円夾三次, 終於200円成功夾到一套, 其實上一手點解唔玩呢? 其實如果熟手, 應該玩多1到2下便可以成功, 但我少玩呢一種, 結果都只用了三下便搞掂.
看看今次的收獲!
最感滿足的兩份收獲.
還有各種大小熊仔.
200円三盒, 都算抵左.
這些熊仔平均都係100~300円左右一隻, 今次都幾多執死雞, 不過可惜夾好多其他野都失敗收場, 如手袋, 地毯, 攬枕, cushion, 煲仔等等, 反而試其他玩意用多左錢.
除了中間隻鬆弛熊用了400円, 另外兩個都只是100円搞掂.
呢三隻200円夾三次就成功三隻.
呢幾隻玩左成千円, 逐下夾.
呢一set多數係執雞, 人地夾到差唔多出來, 兩三次就俾我夾埋, 哈, 今次真係玩的很有成功感呢!
計落條數今次都算有進步, 九日玩了1500元, 基本上每次玩之前都停一停, 諗一諗策略, 才入錢, 成功率大增, 唯一美中不足的是經常見到有新精美貨品, 又貪心想試下, 結果最傷反而係玩呢D新貨品.
