2010東京之旅番外篇

今次特別寫一篇番外篇, 是因為今次東京之旅居然令我們玩夾夾機上左癮! 在東京四處遊覽時便四處夾, 第一次玩夾夾機是在上野, 我們在一間夾夾機店內遇到一位高手, 他隨手用一百円就可以夾出一隻公仔. 於是我們留意他的玩法, 學到一點心得, 於是便去試試, 結果真的成功了! 就是這種成功感, 於是四處遊覽時每當遇上夾夾機便走去看看值不值得夾. 因此在此跟大家分享一下心得, 下圖隻史迪仔就係第一隻戰利品.

偷師經驗所得, 覺得首先要找兩腳的夾夾(如上及下圖果種), 因為試過一腳或三腳的夾夾都是無力的, 真的要靠夾得準才成功, 但成功機會極低, 尤其是三腳夾吊吊下, 根本用唔到力插入公仔堆中夾野.

第二當然係找一些容易跌出來的公仔啦, 只要準確插到位置就可以好容易便推到D公仔落去, 公仔位置越堆得高, 便越容易一插就跣或轆左落去, 反而越近底部, 夾夾便要伸到盡, 根本插唔入公仔堆亦都發唔到力, 不過亦都要小心唔好插正個公仔, 會頂住個夾一樣插唔到.

第三最好係找一些用控制桿來控制夾夾臂, 因為按掣來控制夾夾比較難, 不過大多數夾夾機都係用按掣, 一放手就停, 無得停一停來度下位, 咁就唯有儘量找一些可以在旁邊睇住位置既機, 會比較易就位, 下圖呢一部就係用控制桿, 控制到準哂先一野插入去夾, 這部機我們用千幾円就夾了三對共六隻史迪仔.

最後就係到真係夾公仔果一下, 簡單來說, 就係利用兩隻腳向下插的力量插到公仔的頂部或旁邊, 收起時及上升時便會撥或吊起公仔令公仔反轉, 一轉便容易"轆"落去, 其實並不是真的夾出來, 基本上夾夾成功夾住公仔的機會係極低, 就是夾中左, 都好易在運送過程中跌返落黎, 因為個夾都夾唔實.

當然, 你有張良計, 佢都有過牆梯, 好多時夾夾機的公仔會壓得好實, 令你不得不用多幾個銀仔去夾鬆佢先可以夾到心頭好, 而且一般放得好平, 唔易轆落去, 更有些夾夾機的夾會改裝左成不同一般形狀, 令難度增加.

仲有好多時靚的公仔位置都唔係咁好, 唔靚的就在前面頂住, 唯有夾多幾次夾走障礙物, 又或者多D留意有無俾其他人夾鬆左既機, 咁先容易夾到心頭好, 好像下圖中左邊的海底奇兵, 只有一隻海龜可以夾到, 好彩我們一百円搞定.

結果, 就係因為夾到既成功感, 夾鬆左可以再夾多另一隻, 差少少夾到唔忿氣, 想夾心頭好, 又或者遇到好易夾, 與及去不同地方見到新款式得意公仔等等各種原因, 夾夾下又唔多覺, 每次夾一千幾百円, 我地幾日來咁就前後夾左萬幾円, 足足千幾元港幣, 真係估佢唔到!

下面就係我地既戰利品! 好似返左屋企擺到成床咁, 所以拍返一張全家福, 不過我地只係一直試夾公仔, 其他種類如盒裝玩具或吊住一隻大公仔果一D機都無試, 因為看到其他人無一次成功, 所以我們都無試玩.

而家部分公仔自己keep左, 部份就俾左親戚朋友做手信, 真係下次有機會去日本都要小心D! 千祈唔好亂開始玩夾夾機呀! 哈哈!!

其實想起來呢D都係旅行氣氛的感染下的心癮, 夾果一陣就好玩好過癮, 而家返到香港都無乜心情去夾了, 早兩日經過冒險樂園, 才知原來裏面都有夾夾機, 之前無玩過真係唔多覺, 而入去睇過之後發現冒險樂園的夾夾機有一些裝置, 肯定比日本難夾, 而且睇過價錢亦較貴, 所以都係唔好玩咁多了.....